ဖေဖော်ဝါရီ ၂၆၊ ၂၀၁၄
M-Media
- အိန္ဒိယနိုင်ငံ မွမ်ဘိုင်းမြို့ရှိ ဆိပ်ကမ်းတစ်ခုတွင် ရေတပ်မှ ရေငုပ်သင်္ဘောတစ်စင်း မတော်တဆမှုတစ်ခုဖြစ်ပွားခဲ့ပြီး ရေတပ်သား ၇ ဦး ဒဏ်ရာရခဲ့ကာ ၂ ဦးမှာ ပျောက်ဆုံးနေသည်ဟု သိရသည်။
ဆိပ်ကမ်းတွင် လေ့ကျင့်မှုပြုလုပ်နေစဉ်အတွင်း ရေငုပ်သင်္ဘောအတွင်းရှိ ဘတ္ထရီများထားရာအခန်းမှ မီးခိုးများအူထွက်လာသောကြောင့် သင်္ဘောသား ၇ ဦးမှာ မီးခိုးများ ရှူရှိုက်မိခဲ့ပြီး သတိလစ်မေ့မြောခဲ့ရသည်ဟု ရေတပ်မှ ပြောရေးဆိုခွင့်ရှိသူ ရဟူလ်ဆင်ဟာက ယနေ့တွင် ပြောကြားခဲ့သည်။
“သင်္ဘောသားအားလုံးကို ကုသမှုတွေပြုလုပ်နေပါတယ်။ ဒါပေမယ့် အသေးစိတ် အချက်အလက်တွေကိုတော့ မသိပါဘူး” ဟု ဆင်ဟာက NDTV သတင်းဌာနသို့ ပြောကြားခဲ့သည်။
ရုရှားလုပ် INS Sindhuratna အမည်ရ အဆိုပါ ရေငုပ်သင်္ဘောအနီးသို့ ရေတပ်မှ စစ်သင်္ဘောများသွားရောက် ကူညီနေကြပြီး၊ ရေငုပ်သင်္ဘောပေါ်ရှိ အရာရှိ ၂ ဦးမှာ ပျောက်ဆုံးနေသည်ဟု အမည်မဖော်လိုသော ရေတပ်အရာရှိများ၏ ပြောကြားချက်ကို ကိုးကား၍ Press Trust of India သတင်း အေဂျင်စီက ဖော်ပြခဲ့သည်။
၂၀၁၃ ခုနှစ် သြဂုတ်လက ရုရှားလုပ် INS Sindhurakshak ရေငုပ်သင်္ဘော တစ်စီး မွမ်ဘိုင်း သင်္ဘောကျင်းတစ်ခုတွင် ပေါက်ကွဲမှုဖြစ်ပွားကာ နစ်မြုပ်ခဲ့ သောကြောင့် သင်္ဘောသား ၁၈ ဦးစလုံး အသက်ဆုံးရှုံးခဲ့သည်။ ထို့ပြင် ပြီးခဲ့သည့်လကလည်း INS Sindhughosh ရေငုပ်သင်္ဘောမှာ မွမ်ဘိုင်းဆိပ်ကမ်း သို့ ပြန်လာစဉ် ရေအောက်သို့ နစ်မြုပ်သွားခဲ့ပြီး သေဆုံးပျက်စီးမှု စာရင်းအား ဖော်ပြခဲ့ခြင်းမရှိချေ။
Ref : Aljazeera