စက်တင်ဘာ ၁၂ ၊ ၂၀၁၄
M-Media
– အသင်းရှိ တိုက်စစ်မှူးများဖြစ်ကြသည့် ၀ိန်းရူနီ၊ ရော်ဘင်ဗန်ပါစီတို့၏ ဂိုးသွင်းစံချိန်ကို မမှီသောကြောင့် ၀ဲလ်ဘတ်အား အာဆင်နယ်သို့ ရောင်းချခဲ့ခြင်းဖြစ်သည်ဟု မန်ယူနည်းပြ ဗန်ဂါးလ်က ပြောကြား လိုက်သည်။
မန်ယူလူငယ်အကယ်ဒမီမှ ထွက်ပေါ်လာသည့် ၀ဲလ်ဘတ်မှာ အာဆင်နယ်သို့ ယူရိုသန်း ၂၀ ဖြင့် အပြောင်းအရွှေ့ နောက်ဆုံးနေ့တွင် ရောက်ရှိခဲ့ခြင်းဖြစ်သည်။ ၀ဲလ်ဘတ်မှာ မန်ယူ၌ ကစားစဉ် တစ်ရာသီ ၉ ဂိုးအထက် သွင်းယူနိုင်ခြင်း မရှိဘဲ ၎င်း၏ ထိုမှတ်တမ်းက ရောင်းချမှုနောက်ကွယ်မှ အကြောင်း တစ်ရပ်ဖြစ်သည်ဟု ဗန်ဂါးလ်ကဆိုသည်။
“သူတို့ရဲ့ စွမ်းရည်တွေကို ကျွန်တော်ယုံကြည်လာဖို့ အတွက် ကစားသမားအားလုံးကို အခွင့်အရေးပေး ခဲ့ပါတယ်။ ၀ဲလ်ဘတ်က အသက် ၉ နှစ်အရွယ်ကတည်းက ဒီမှာရှိခဲ့တာပါ။ ဆန်းဒါးလန်းမှာ ကစားပြီးတဲ့နောက် ဒီမှာ သုံးနှစ်ကြာ ကစားခဲ့ပါတယ်။ ဒါပေမယ့် ဗန်ပါစီနဲ့ ရူနီတို့ရဲ့ စံချိန်ကိုတော့ မမှီခဲ့ပါဘူး။ ဒါ့ကြောင့် သူ့ကို ကျွန်တော်တို့ ထွက်ခွာခွင့်ပြုခဲ့တာပါ” ဟု ဗန်ဂါးလ်က သတင်းထောက်များအား ပြောကြားခဲ့သည်။
အာဆင်နယ်အသင်း၏ အဓိက တိုက်စစ်မှူး ဂျီရော့မှာ ဒဏ်ရာရနေသောကြောင့် မနက်ဖြန်တွင်ကစားမည့် မန်စီးတီးအသင်းနှင့်ပွဲတွင် ၀ဲလ်ဘတ်မှာ ပွဲထွက်ကစားသမား ဖြစ်လာဖွယ်ရှိနေသည်။