စက်တင်ဘာ ၁၅ ၊ ၂၀၁၄
M-Media
– အစ္စရေး၏ တစ်လကျော်ကြာ ကျူးကျော်တိုက်ခိုက်မှုကို ခံခဲ့ရသည့် ဂါဇာကမ်းမြှောင်တွင် စာသင်ကျောင်းများအား ယနေ့တွင် ပြန်လည်ဖွင့်လှစ်ခဲ့ပြီး ကျောင်းသား ၅ သိန်းနီးပါး ပြန်လည်တက်ရောက်နေသည်ဟု သိရသည်။
အစ္စရေး၏ တိုက်ခိုက်မှုကြောင့် စာသင်ကျောင်း ၂၅၀ ကျော် ပျက်စီးသွားခဲ့ပြီး ကုလမှ စီစဉ်ပေးထားသည့် စာသင်ကျောင်း ၉၀ ကျော်မှာလည်း အိုးအိမ်စွန့်ခွာ ထွက်ပြေးခဲ့ရသည့် ပါလက်စတိုင်းများအတွက် ကယ်ဆယ်ရေးစခန်းများအဖြစ် အသုံးပြုနေရသောကြောင့် ကျောင်းဖွင့်ချိန်မှာ သီတင်းပတ်ပေါင်း များစွာ နောက်ကျခဲ့ရသည်။
ပုံမှန်သင်ခန်းစာများ မသင်မီ စစ်ဒဏ်ခံခဲ့ရသည့် ကျောင်းသားများအား စိတ်ဒဏ်ရာများ ကုသပေးခြင်း၊ စိတ်ပိုင်းဆိုင်ရာ ထိခိုက်မှုအတွက် အကြံဥာဏ်ပေးခြင်း တို့ကို ပြုလုပ်သွားမည်ဖြစ်သည်။
“အခုလက်ရှိ စိတ်ပိုင်းဆိုင်ရာ အကူအညီတွေပေးပြီးတဲ့နောက်မှာ အရင်ဆုံး ဦးစားပေးရမှာက ကျွန်တော်တို့ရဲ့ ကျောင်းသားတွေ ပုံမှန် သင်ရိုးညွှန်းတမ်းအတိုင်း ပြန်သင်နိုင်ဖို့ပါပဲ” ဟု ဂါဇာကမ်းမြှောင်ရှိ စာသင်ကျောင်းပေါင်း ၂၀၀ ကျော်ကို လည်ပတ်ပေးနေသည့် ကုလသမဂ္ဂ UNRWA မှ အကြီးအကဲ ပီယာရီ ကရန်ဘူးလ်က ပြောကြားခဲ့သည်။
UNRWA မှာ ကျောင်းသားပေါင်း ၂ သိန်း ၄ သောင်းကျော်ကို အကြံအဥာဏ်များ ပေးနိုင်ရန်တွက် ၀န်ထမ်းပေါင်း ၂၀၀ ကျော်ကို ခန့်အပ်ထားသည်ဟု ၎င်းက ထပ်လောင်းပြောကြားခဲ့သည်။
ကုလ၏ စာသင်ကျောင်း ၂၀ တွင် ပါလက်စတိုင်း ဒုက္ခသည် ၆၄၀၀၀ ခန့်မှာ ခိုလှုံနေရဆဲဖြစ်သည်။ ဂါဇာကမ်းမြှောင် ဒုတိယပညာရေးဝန်ကြီး ဇေယဒ် သာဘတ်ကမူ အစ္စရေး၏ ကျူးကျော်တိုက်ခိုက်မှုအတွင်း ဂါဇာရှိ စာသင်ကျောင်းပေါင်း ၂၆ ကျောင်းမှာ လုံးဝ ပြိုပျက်ခဲ့သည်ဟု ပြောကြားခဲ့သည်။
ref_Al Jazeera and agencies