နိုဝင်ဘာ ၁၄၊ ၂၀၁၄
M-Media
မိုးစက်
ရန်ကုန်။ ။ အသက် ၁၆ နှစ်မှ အသက် ၃၅ နှစ်အတွင်းရှိ လူငယ်များစွမ်းအင်မြှင့်တင်နိုင်ရေး အတွက် မြန်မာ မွတ်စလင် လူငယ်များအဖွဲ့ (မ.မ.လ) ဌာနချုပ်မှ ဦးစီးပြီး ကျပန်းစကားပြောပြိုင်ပွဲတစ်ရပ်အား ဒီဇင်ဘာလ ၇ ရက်နေ့တွင် ကျင်းပပြုလုပ်သွားမည် ဖြစ်ကြောင်း သိရပါတယ်။
ပြိုင်ပွဲတွင် ယှဉ်ပြိုင်ရမည့်ခေါင်းစဉ်များမှာ
၁) Unity in Diversity (မတူကွဲပြားမှုများမှ ညီညွတ်ရေးဆီသို့)၊
၂) Youth power for forming Peace (လူငယ်စွမ်းအင် ငြိမ်းချမ်းရေးအသွင်)၊
၃) The Role of Leadership (ခေါင်းဆောင်မှု၏ အခန်းကဏ္ဍ)၊
၎) The Change (ပြုပြင်ပြောင်းလဲရေးဆိုသည်မှာ)၊
၅) Human Rights (လူ့အခွင့်အရေးဆိုသည်မှာ)
စသည့်ခေါင်းစဉ်များသတ်မှတ်ပေးထားပြီး ပြိုင်ပွဲကျင်းပသည့်နေ့တွင် အထက်ပါ ခေါင်းစဉ် (၅) ခုအား မဲနှိုက်၍ ကျရာ ခေါင်းစဉ်တစ်ခုအား (၁၂) မိနစ်စာ ပြောဆိုယှဉ်ပြိုင်ရမည့်ဖြစ်ကြောင်း သိရပါတယ်။
“အခုလိုပွဲကျင်းပပေးရခြင်းဟာ လူငယ်တွေ ပြောရဲဆိုရဲရှိလာအောင်လုပ်ပေးတာပါ။ နောက်ပြီး ဒီပြိုင်ခိုင်းတဲ့ ခေါင်းစဉ်တွေကိုလည်း လူငယ်တွေအနေနဲ့ လေ့လာသင့်တာတွေပါ။ သူတို့လည်း ဒီအကြောင်းအရာတွေကို စိတ်ဝင်စားလာအောင်လို့ပါ။ လူ့အခွင့်အရေးဆိုတာတွေကိုလည်း သူတို့ကိုသိစေချင်လို့ပါ။ ဒါကြောင့် ဒီလိုပွဲမျိုးတွေ ကျင်းပပေးရတာပါ” ဟု ပြိုင်ပွဲစီစဉ်ဖြစ်ခဲ့ပုံနှင့် ပတ်သက်ပြီး မ.မ.လ ဌာနချုပ်မှ တာဝန်ရှိသူတစ်ဦးက M-Media ကို ပြောပါတယ်။
ယင်းပြိုင်ပွဲအား မည်သည့် လူမျိုး/ဘာသာဝင်မဆို ဘာသာပေါင်းစုံယှဉ်ပြိုင်နိုင်ရန် သတ်မှတ်ထားပြီး ပြိုင်ပွဲပြိုင်သည့်နေ့တွင် ထူချွန်သူများအား တစ်ခါတည်း ဆုပါချီးမြှင့်ပေးမည်ဖြစ်ကြောင်း သိရှိရပါတယ်။