နိုဝင်ဘာ ၂၂ ၊၂၀၁၄
M-Media
– ၂၀၁၀ ခုနှစ်က Yeonpyeong ကျွန်းအား ဗုံးကြဲတိုက်ခိုက်မှုကို မေ့မပစ်ရန် မြောက်ကိုရီးယား ပြည်သူ့တပ်မတော် KPA က တောင်ကိုရီးယား စစ်တပ်ကို သတိပေးလိုက်သည်ဟု မြောက်ကိုရီးယား နိုင်ငံပိုင် သတင်းဌာန KCNA က ဖော်ပြခဲ့သည်။
တောင်ကိုရီးယားစစ်တပ်မှာ Paekryoung ကျွန်းနှင့် Yeonpyeong ကျွန်းတို့တွင် Hoguk အမည်ဖြင့် တိုက်ခိုက်ရေး စစ်ရေးလေ့ကျင့်မှုတစ်ခုကို ပြုလုပ်ခဲ့ပြီး နိုဝင်ဘာ ၂၃ ရက်နေ့တွင်လည်း Yeonpyeong ကျွန်း တိုက်ခိုက်ခံရမှုတွင် သေဆုံးသွားသော စစ်သားများအတွက် အောက်မေ့ဖွယ်အခမ်းအနား ကျင်းပရန် ရှိနေချိန်တွင် မြောက်ကိုရီးယားဘက်က ထိုကဲ့သို့ သတိပေးလိုက်ခြင်းဖြစ်သည်။
ထို့ပြင် KPA အရာရှိများနှင့် အနောက်တောင်ပိုင်းမှ စစ်တပ်များမှာလည်း တောင်ကိုရီးယား၏ အဆိုပါစစ်ရေးလေ့ကျင့်မှုကို သတိဖြင့် စောင့်ကြည့်ခဲ့သည်ဟု KCNA က ထည့်သွင်းကြေညာခဲ့သည်။
နိုဝင်ဘာ ၁၀ ရက်နေ့မှ ၂၁ ရက်နေ့အထိ ပြုလုပ်ခဲ့သည့် အဆိုပါ စစ်ရေးလေ့ကျင်မှုမှာ တောင်ကိုရီးယား နိုင်ငံသမိုင်းတွင် အကြီးဆုံး စစ်ရေးလေ့ကျင်မှုလည်း ဖြစ်ပြီး စစ်သားပေါင်း ၃၃၀၀၀၀ ပါဝင်ခဲ့ကြသည်။
၂၀၁၀ ခုနှစ်က ဖြစ်ပွားခဲ့သော Yeonpyeong ကျွန်းတိုက်ခိုက်မှုတွင် တောင်ကိုရီးယား မရိန်းစစ်သား ၂ ဦးနှင့် အရပ်သား ၂ ဦး သေဆုံးခဲ့ရသည်။