ဒီဇင်ဘာ ၁၄ ၊ ၂၀၁၄
M-Media
– ပြည်တွင်းအောင်မြင်မှုများ ရရှိသော်လည်း ဥရောပတွင် မအောင်မြင်သည့် ဂျူဗင်တပ်စ် အသင်းတွင် မက်ဆီနှင့် ရော်နယ်ဒိုတို့ကဲ့သို့ ပုံမှန် ဂိုးသွင်းရှင်မျိုး လိုအပ်သည်ဟု ဂိုးသမား ဘူဖွန်က ပြောကြားလိုက်သည်။
ဂျူဗင်တပ်စ်မှာ စီးရီးအေ ဆုဖလားကို နောက်ဆုံး ၃ နှစ်ဆက်တိုက် ရရှိခဲ့သော်လည်း ဥရောပတွင် အောင်မြင်မှုများ မရရှိခဲ့ချေ။ ယခုနှစ် ချန်ပီယံလိဂ် တွင်လည်း ခြေစွမ်းပြနိုင်ခြင်း မရှိဘဲ ပွဲစဉ် ၆ ပွဲစလုံးပြီးမှ နောက်တစ်ဆင့်ကို တက်ရောက်နိုင်ခဲ့သည်။
ဘူဖွန်ကမူ ယခုနှစ်တွင် တိုက်စစ်မှူး တီဗက်ဇ်မှာ ခြေစွမ်းပြနေသော်လည်း ဥရောပတွင် အဓိက အသင်းဖြစ်လာရန်အတွက် အသင်း အနေဖြင့် ဂိုးသွင်းနှုန်းမြင့်မားသည့် တိုက်စစ်မှူးမျိုး လိုအပ်သည်ဟု ပြောကြားခဲ့သည်။
`ဂျူဗင်တပ်စ်အသင်းဟာ ချန်ပီယံလိဂ်ကို မရတဲ့ အသင်းတွေမှာရှိတဲ့ အားနည်းမှုမျိုး ရှိနေပါတယ်။ ကျွန်တော်တို့မှာ ခရစ္စတီယာနို ရော်နယ်ဒိုနဲ့ လီယွန်နယ် မက်ဆီတို့ မရှိပါဘူး။ သူတို့တွေဟာ သူတို့အသင်းအတွက် အဓိပ္ပါယ်ရှိပါတယ်။ ဘာ့ကြောင့်လည်းဆိုတော့ ဒီလိုကစားသမားမျိုး ရှိနေခြင်းက အသင်း အဆိုးဆုံး အချိန် ရောက်တာတောင်မှ အနည်းဆုံး ၁ ဂိုးလောက် သွင်းပေးလို့ပါပဲ´ ဟု ဘူဖွန်က AS သတင်းစာသို့ ဖွင့်ဟခဲ့သည်။
ဂျူဗင်တပ်စ်မှာ ယခုလက်ရှိတွင် စီးရီးအေတွင် ၁၄ ပွဲကစားပြီးနောက် ဇယားအားဦးဆောင်နေပြီး လာမည့် တနင်္ဂနွေနေ့တွင် ဆမ်ဒိုးရီးယားသင်းနှင့် ယှဉ်ပြိုင် ရမည်ဖြစ်သည်။