ဇန်န၀ါရီ ၁၃၊ ၂၀၁၅
M-Media
– ၂၀၁၄ ခုနှစ်အတွက် ကမ္ဘာ့အကောင်းဆုံး ဘောလုံးသမားဆု Ballon d’Or ကို ရီးယဲလ်မက်ဒရစ်တိုက်စစ်မှူး ခရစ္စတီယာနို ရော်နယ်ဒိုက ဆွတ်ခူးရရှိခဲ့သည်ဟု သိရသည်။
ဆုကြေညာခြင်း အခမ်းအနားကို ဇူးရစ်ခ်ျမြို့တွင် ယမန်နေ့ ညနေက ပြုလုပ်ခဲ့ခြင်း ဖြစ်ပြီး ရော်နယ်ဒိုမှာ စုစုပေါင်း မဲအရေအတွက် ၃၇.၆၆ ရာခိုင်နှုန်းဖြင့် မက်ဆီ၊ နူအာတို့ကိုကျော်ကာ ဆွတ်ခူးရရှိခဲ့ခြင်း ဖြစ်သည်။ မက်ဆီကမူ ၁၅.၇၆ ရာခိုင်နှုန်းဖြင့် ဒုတိယရရှိခဲ့ပြီး ဂျာမန်ဂိုးသမား နူအာက ၁၅.၇၂ ရာခိုင်နှုန်းဖြင့် တတိယရရှိခဲ့သည်။
`ကျွန်တော့်အမေနဲ ကျွန်တော့်ရဲ့မိသားစုကို တွေ့နေရပါတယ်။ ကျွန်တော့်ကို မဲပေးခဲ့ကြတဲ့ သူတွေအားလုံးကို ကျွန်တော် ကျေးဇူးတင်ပါတယ်။ ကျွန်တော့် နည်းပြ၊ အသင်းဖော်တွေနဲ့ အသင်းရဲ့ ဥက္ကဌကိုရောပေါ့ဗျာ။ မမေ့နိုင်စရာ နှစ်တစ်နှစ် ဖြစ်ခဲ့ပါတယ်။ ဒီလိုဆုကို ရခဲ့တာဟာ ထူးခြားမှုဖြစ်ပြီး ကျွန်တော် ပြောချင်တာကတော့ လက်ရှိအတိုင်း ဆက်လက်ကြိုးစားသွားမှာဖြစ်ပြီး တစ်ဦးချင်း၊ အသင်းလိုက် ဆုတံဆိပ်တွေ ပိုမိုရရှိအောင် ကြိုးစားသွားမှာပါ။ ကျွန်တော့် မိဘတွေ အတွက်ပေါ့ဗျာ´ ဟု ရော်နယ်ဒိုက ဆုလက်ခံရယူပြီးနောက် ပြောကြားခဲ့သည်။
ယမန်နှစ်ကလည်း အဆိုပါဆုကို ရရှိခဲ့သည့်အတွက် ယခုဆုမှာ ရော်နယ်ဒို၏ သုံးကြိမ်မြောက် Ballon d’Or ဆုဖြစ်ပြီး ၂ ကြိမ်ဆက်ရရှိခဲ့သည့် ပထမဆုံး ရီးယဲလ်ကစားသမား ဖြစ်လာခဲ့သည်။
ရော်နယ်ဒိုကမူ မိမိအနေဖြင့် ထိုဆုကို သုံးကြိမ်သုံးခါတိုင်တိုင် ရရှိလိ့မ်မည်ဟု မမျှော်လင့်ခဲ့ကြောင်း၊ သမိုင်းတစ်လျှောက် အကောင်းဆုံးဘောလုံးသမားတစ်ဦး ဖြစ်ချင်ကြောင်း၊ အားလုံးကိုလည်း ကျေးဇူးတင်ရှိပါကြောင်း ထပ်လောင်း ပြောကြားခဲ့သည်။
အဆိုပါ ဆုချီးမြှင့်ပွဲအခမ်းအနားအတွင် အကောင်းဆုံး နည်းပြဆုကိုလည်း ချီးမြှင့်ခဲ့ပြီး ဂျာမနီအသင်း ကမ္ဘာ့ဖလားတွင် ဗိုလ်စွဲနိုင်အောင် ဦးဆောင်ပေးခဲ့သည့် နည်းပြ ဂျိုအာချင်းလိုက အန်ဆယ်လော့တီ၊ ဆီမြွန်နီတို့ကို ကျော်ဖြတ်၍ အကောင်းဆုံး နည်းပြဆု ရရှိခဲ့သည်။
Ref : dailymail