ဇူလိုင် ၁၁၊ ၂၀၁၅
M-Media
– ချယ်ဆီးမှ ဂိုးသမားဖြစ်သူ ပီတာချက်အား ခေါ်ယူထားသော်လည်း မိမိအနေဖြင့် နောက်ထပ်ကစားသမားများကို ဆက်လက်ခေါ်ယူသွားရန် ရှိနေသည်ဟု အာဆင်နယ်နည်းပြ အာဆင်ဝင်းဂါးက ပြောကြားလိုက်သည်။
အာဆင်နယ်မှာ ပေါင် ၁၀ သန်းဖြင့် ပီတာချက်အား ပြီးခဲ့သည့်တစ်ပတ်က အပြီးသတ်ခေါ်ယူနိုင်ခဲ့ပြီး ယခုနှစ်နွေရာသီ အပြောင်းအရွှေ့တွင် ၀င်းဂါး၏ ပထမဆုံးခေါ်ယူမှုလည်း ဖြစ်ခဲ့သည်။
ပြီးခဲ့သည့်ရာသီတွင် အာဆင်နယ်၏ အဓိကကစားသမားများဖြစ်သော သီယိုဝေါလ်ကော့၊ ဂျက် ၀ီလ်ရှိုင်းယား၊ အိုဇေးလ်၊ ဂျရူးတို့မှာ ဒဏ်ရာပြဿနာနှင့် ရုန်းကန်ခဲ့ရပြီး ၀င်းဂါးကမူ ထိုကစားသမားများကို ကြံ့ခိုင်မှုပြန်ပြည့်ဝအောင် ဆောင်ရွက်ရန် စိတ်အားထက်သန်နေသည်ဟု ၀န်ခံခဲ့သည်။
“အသင်းရဲ့ နေရာတွေမှာ တောင့်တင်းစေဖို့ အကောင်းဆုံး နည်းလမ်းကတော့ ပြီးခဲ့တဲ့ရာသီက များများစားစား မကစားခဲ့ရတဲ့ ကစားသမားတွေကို ကြံ့ခိုင်မှုပြည့်ဝအောင် လုပ်ချင်တာပါပဲ” ဟု ၀င်းဂါးက Arsenal Player သို့ ပြောကြားခဲ့သည်။
ထို့ပြင် ယခုနှစ်တွင် ထိုကစားသမားများ၏ ပူးပေါင်းပါဝင်မှုနှင့် ယှဉ်ပြိုင်လိုစိတ်များမှ အကျိုးကျေးဇူးများ ခံစားရနိုင်သည်ဟု မျှော်လင့်ပြီး မိမိ၏ ပထမအသင်းကိုလည်း အဆင့်မြှင့်ချင်သည်ဟု ဆိုသည်။
“အဲဒီနောက်မှာတော့ တကယ်လို့ အရည်အသွေးရှိတဲ့ကစားသမားတွေ ထပ်ပေါင်းထည့်နိုင်မယ်ဆိုရင် ကျွန်တော်တို့ လုပ်သွားမှာပါ”
အာဆင်နယ်မှာ ရာသီအချို့ ခြေစမ်းပွဲများကို ဇူလိုင်လ ၁၅ ရက်နေ့တွင် စတင်ကစားမည်ဖြစ်သည်။
Ref: Goal