စက်တင်ဘာ ၄၊ ၂၀၁၅
M-Media
– ၂၀၁၆ ခုနှစ်တွင် ထုတ်ဝေမည့် ဂင်းနစ်မှတ်တမ်း စာအုပ်တွင် ချယ်ဆီးနည်းပြ မော်ရင်ဟို၏ ကလပ်အသင်း ၄ ခုတွင် ရရှိခဲ့သည့် စံချိန်မှတ်တမ်း ၅ ခုအား ထည့်သွင်းဖော်ပြမည်ဟု သိရသည်။
ယခုနှစ်ရာသီအစတွင် ချယ်ဆီးမှာ ရလဒ်ဆိုးများနှင့် ရင်ဆိုင်နေရပြီး ပရီးမီးယားလိဂ် ၄ ပွဲကစားပြီးချိန်တွင် တစ်ပွဲသာအနိုင်ရထားကာ မော်ရင်ဟိုမှာ ဝေဖန်မှုများနှင့် ရင်ဆိုင်နေရသည်။
သို့သော်လည်း ပေါ်တို၊ ချယ်ဆီး၊ အင်တာနှင့် ရီးယဲလ်မက်ဒရစ်တို့တွင် ၎င်း၏ နည်းပြစွမ်းရည်အား မှတ်ကျောက်တင်ထားမှု မှတ်တမ်းများ ကမ္ဘာ့ဂင်းနစ်မှတ်တမ်းစာအုပ်တွင် ထည့်သွင်းခံရမည့်အတွက် မော်ရင်ဟိုက ပျော်ရွှင်နေသည်။
မော်ရင်ဟိုမှာ နည်းပြတစ်ယောက်အနေဖြင့် အိမ်ကွင်း အချိန်အကြာဆုံး ရှုံးပွဲမရှိသည့် စံချိန်ကို ရရှိထားပြီး ၉ နှစ်တာကာလ ကလပ်အသင်းလေးခုတွင် အိမ်ကွင်း ၁၅၁ ပွဲ ရှုံးပွဲမရှိခဲ့ချေ။ ပေါ်တိုနှင့် အင်တာအသင်းတို့အား ချန်ပီယံလိဂ်ဖလားရရှိအောင် စွမ်းဆောင်ပေးနိုင်ခဲ့သည့် မော်ရင်ဟိုမှာ မတူညီသော ကလပ်အသင်းများဖြင့် ချန်ပီယံလိဂ်ကို ဆွတ်ခူးရရှိခဲ့သည့် နည်းပြ ၅ ဦးထဲမှ တစ်ဦးအဖြစ် ဂင်းနစ်စာအုပ်တွင် မှတ်တမ်းဝင်ခဲ့သည်။
ထို့ပြင် ၄၉ နှစ်နှင့် ၁၂ ရက်ဖြင့် ချန်ပီယံလိဂ် ပွဲပေါင်း ၁၀၀ ပြည့်မြောက်သည့် မော်ရင်ဟိုမှာ အသက်အငယ်ဆုံးဖြင့် ချန်ပီယံလိဂ် ပွဲ ၁၀၀ ပြည့်မြောက်သည့် စံချိန်ကိုလည်း ရရှိခဲ့သည်။
၂၀၀၄-၀၅ ဘောလုံးရာသီက ချယ်ဆီးအသင်းနှင့် ပရီးမီးယားလိဂ်ဗိုလ်စွဲချိန်တွင် မော်ရင်ဟိုက အသင်းအား ၉၅ မှတ်ရရှိအောင် စွမ်းဆောင်ပေးနိုင်ခဲ့ပြီး ထိုအမှတ်မှာ ပရီးမီးယားလိဂ်သမိုင်းတစ်လျှောက် စံချိန်တင်အမှတ်ဖြစ်သည်။ ပရီးမီးယားလိဂ်မှ အခြားစံချိန်တစ်ခုမှာ ချယ်ဆီးနှင့် အိမ်ကွင်း၌ ရှုံးပွဲမရှိသည့်ပွဲ အများဆုံးရရှိအောင် စွမ်ဆောင်နိုင်ခြင်းဖြစ်သည်။
အသက် ၅၂ အရွယ် မော်ရင်ဟိုကမူ ထိုကဲ့သို့ စံချိန်များ တင်နိုင်ခဲ့ခြင်းအတွက် ပျော်ရွှင်မိပြီး၊ အနာဂတ် အောင်မြင်မှုအတွက် အာရုံစိုက်သွားမည်ဟု ပြောကြားခဲ့သည်။
“သူတို့ ကျွန်တော့်ကို ဒီလိုပေးတဲ့ဆုတွေကို ရုံးခန်းမှာချိတ်ထားရတာ ကောင်းပါတယ်။ ပျော်စရာကောင်းတဲ့ အရာတစ်ခုပါ။ တစ်နေ့မှာ ဂင်းနစ်မှတ်တမ်းစာအုပ်ထဲ ၀င်လိမ့်မယ်ဆိုပြီး ငယ်ငယ်တုန်းက စိတ်တောင် မကူးခဲ့ပါဘူး။ ခင်ဗျားတို့ ကျွန်တော့်အကြောင်းသိပါတယ်။ ဒီဆုတွေဟာ အတိတ်က ကျွန်တော်လုပ်ခဲ့တာဖြစ်ပြီး တော်တော်လေး ကျေနပ်စရာပါပဲ။ ဒါပေမယ့် ကျွန်တော့်အတွက် ပိုအရေးကြီးတာက အနာဂတ်မှာ လုပ်နိုင်ဖို့ပါပဲ” ဟု မော်ရင်ဟိုက ပြောကြားခဲ့သည်။
Ref: Goal