ဇူလိုင် ၁၂၊ ၂၀၁၄
M-Media
သုတ
ဇူလိုင် ၁၂-ရက် ညနေပိုင်းက ၃၄-လမ်း၊ ၇၄-၇၅ လမ်းကြား မောရဂီဝါရပ် ဖလံဘိုဝင်း(အမြောက်တန်းကြီး)အတွင်းနေထိုင်သည့် လူငယ်များကို အကြောင်းပြချက် မပေးဘဲ ဖမ်းဆီးခေါ်ဆောင်သွားမှုအပေါ် ဖမ်းဆီးခံခဲ့ရသူ တစ်ဦး၏ ဖခင်ဖြစ်သူနဲ့ ဆက်သွယ်မေးမြန်းဖြစ်ခဲ့ပါတယ်။
“ကျွန်တော်တို့ ၀ါလွှတ်ချိန်(ဥပုသ်ဖြေချိန်)မတိုင်ခင် ထိုင်နေကြတုန်း ၅-မိနစ်အလိုမှာ အိမ်စီးကားတချို့နဲ့ ၀င်လာပြီးဖမ်းတယ်။ ရဲဝတ်စုံနဲ့တော့ပါတယ်။ အမှန်ကတော့ ကျွန်တော်တို့ ၀ါဖြေမယ့်အချိန်မှာ ရုန်းရင်းဆန်ခတ်ဖြစ်အောင် လုပ်တဲ့ပုံစံပါပဲ။
အဲလိုဝင်ဖမ်းတော့ ကျွန်တော့်သမီးကအော်တယ် ဘာလို့ ငါ့မောင်ကို ဖမ်းတာလဲ။ ငါ့မောင်က ဘာမှ မလုပ်ထားဘူးလို့အော်တယ်။
ဘယ်ကို ဖမ်းသွားတယ်လို့တော့ အခုထိ မသိရသေးပါဘူး။ ဟုတ်ပါတယ် အဲ့ဒီအချိန်က ကျွန်တော့်သားရယ် သူ့သူငယ်ချင်းတွေရယ်က အဲ့လို ထိုင်နေကျပါ။ ကျွန်တော့် တူလေးတွေလည်း ပါသွားတယ်။ အခု ဖမ်းသွားတာက ကျွန်တော့် ညီအစ်ကို မောင်နှမတွေက မွေးချင်းတွေ များပါတယ်။ ဖမ်းတာက ၁၁-ယောက်လောက် ဖမ်းသွားတယ်။
ကျွန်တော့်သားက ၁၈-နှစ် ပြည့်ပြီးပါပြီ။ ၉၅-ခုနှစ် မွေးတာပါ။ ဘယ်ခေါ်သွားမှန်းမသိပါဘူး။ ၃၂-လမ်း မောရဂီဝါရပ်ကွက်ရုံးမှာ ခေါ်ပြီး မေးမြန်းနေတယ်ဆိုတာလည်း မဟုတ်ပါဘူး။ ကျွန်တော်ကိုယ်တိုင် ရောက်ခဲ့ပါတယ်။ အဲ့ဒီရုံးမှာ မရှိပါဘူး။ ဖမ်းတာကို သူတို့လည်း မသိလိုက်ပါဘူးလို့ ရပ်ကွက်ရုံးက ပြောပါတယ်။”လို့ ဖြေကြားခဲ့ပါတယ်။
၎င်းလူငယ်များအား မည်သည့်အကြောင်းကြောင့် ဖမ်းဆီးခံရသည်ကို မသိရှိရသော်လည်း ဇူလိုင်လဆန်းက မန္တလေးတွင်ဖြစ်ပွားခဲ့သော အကြမ်းဖက်မှုများတွင် လမ်းပေါ်၌ လက်နက်များကိုင်ဆောင်၍ အကြမ်းဖက်ရမ်းကားနေသူများကို ဖမ်းဆီးအရေးယူခြင်းမရှိပဲ အကြမ်းဖက်ခံရသည့် အစ္စလာမ်ဘာသာဝင်များအား ယခုကဲ့သို့ အကြမ်းဖက်မှုတရားခံအဖြစ် ဖမ်းဆီးနေခြင်းမှာ အစိုးရတာဝန်ရှိသူများမှ မွတ်စလင်များ အပေါ် တဖက်သက် အကွက်ချပြီး အပြစ်ပုံချနေမှန်း သိသာတယ်လို့ မြို့ခံအချို့က ပြောပါတယ်။